[平民食堂系列] 係市區食飯， 真係冇幾十蚊都唔使旨意落樓啦！揸住果雞碎咁多，又想食得特別啲，有乜嘢好推介先？咁岩行過銅鑼灣鵝頸橋附近，聞到一陣好香嘅味道飄緊過嚟，咪比佢吸左埋去囉！行到埋去，佢門口黏咗好多張名人嘅相！我心諗，應該唔會衰得去邊啦掛！
望住個餐牌，見到有個叫招牌豬扒麻辣四川粉，咪叫黎試吓囉！ （我都估到你地實話，麻辣粉炸嘛，有咩咁特別喎！又話介紹啲特別野？ X仔都有啦！）嗱嗱嗱！真係有唔同架！起碼個豬扒你係譚仔唔會搵到囉！本身都諗住叫個中辣嘅，但個店員就同我講：中辣好辣咖喎！講到咁，咪叫小辣囉！
結果我叫左個招牌豬扒麻辣四川粉！碗野一嚟到，老老實實，個樣真係唔太討好！不過我都講左無數咁多次啦！我唔係一部相機黎咖嘛！我真係食落肚架嘛！咬落件豬扒度，又真係幾爽喎！而且都好入味！香料都幾重！咁下一步就梗係試吓個湯底啦！原來小辣都算幾難喎，好彩冇叫中辣咋！如果唔係，今次真係辣到顛啦會！再試吓個四川粉，個感覺同普通麵都幾唔同，咬落去非常彈牙！但係相對來講就冇吸到個湯底嘅味，個味道都幾分開囉！係要扣分架喇講真！（知喇！我知我好奄尖嘛！咁碗野都要＄48架嘛，有少少要求都得掛！ ）
提提你！我真係強烈建議你試吓四川粉，如果叫米線嘅話，咁你不如去返X仔啦！ 仲有啊，如果你係食量驚人派，不妨叫過雞扒豬扒雙拼啦！個雞扒雖然係炸，不過真係好好味！真係熱氣到爆燈都值得架！
巴蜀軒
灣仔駱克道368號百玲大廈地下G1舖
西環德輔道西362號地下
Search